大家愛遲到（下）
上集：https://bit.ly/2PKKUyL
得啦，我唔想再聽落去，我唔想再忍受呢種垃圾。
我要移民！
講起上嚟，遲到族幾乎唔會移民，都好少去旅行。
因為佢哋接受唔到急促嘅生活節奏，具體啲講，當佢哋去到外地，連準時去機場搭飛機返嚟，都係一個艱難、需要協助嘅任務。
好彩，我唔再有呢個問題。
我遞交咗移民申請，之後就要去參加移民面試。
「來自遲到族？」面試官似笑非笑咁望住我：「小姐，移民唔係一件兒戲嘅事，今日移民，聽日唔習慣就移番轉頭，咁係唔得㗎喎。」
佢言下之意，係睇死我一定唔習慣唔遲到嘅生活，移咗民都會後悔。
我用行動證明我嘅決心，之後嗰幾日，每朝面試官返工，我都會喺門口同佢打招呼。
我可以唔遲到，甚至比佢更早到。
冇咗遲到族嘅缺點，加埋優秀嘅學歷同履歷，我嘅移民申請被接受。
申請移民之前，我已經多次去旅行兼考察，真係好羨慕啲人唔會遲到、啲舖頭會準時開門。
依加，我終於要離開懶散嘅部族，去呢個充滿幹勁嘅城市。
移民後第一件事，當然係租屋住。
過程非常順利，無論係約地產睇樓定約業主簽約，佢哋都冇遲到，同遲到族嗰種拖拖拉拉，完全係兩個世界。
安頓好自己嘅生活之後，我就開始搵工。
呢樣更加冇難度，我工作能力咁高，以前喺遲到族搵工都好順利。
我躊躇滿志，我以前喺遲到族做總監，依加移咗民，係咪可以搵高一級呢？
我寄咗CV去呢度嘅幾間大公司，冇回覆。
我有啲驚訝，只好放低身段，搵低少少嘅職位。
再低啲，再低啲，到我申請一間細公司嘅經理嗰陣，我先得到面試嘅機會。
呢份工無論係職位定人工，都令我唔滿意。
但我移民之後，呢間係第一間叫我去面試嘅公司，我決定去睇吓。
面試嗰日，我特登早咗十五分鐘去到，門口已經坐滿咗應徵者。
我坐埋一邊等，過咗一陣就輪到我，效率真係好高。
面試官問：「你認為，點解你可以勝任經理嘅職位？」
我滔滔不絕咁講我嘅履歷、公司嘅理念等等，但面試官好挑剔咁瞇起對眼，話：「遲到族嘅某啲履歷，我哋係唔承認嘅。你仲有冇咩優點？」
我都知道，移民會出現呢種情況，新公司未必會承認我所有嘅學歷同履歷。
但係，我係咁優秀，猶如黑夜中嘅螢火蟲，呢啲小事都唔成問題。
好似以往一樣，我好有自信咁答：「我做嘢好有效率，保證每日都可以完成我應該負責嘅工作，而且從來都唔會遲到。」
面試官好驚訝咁望住我，然後笑咗出聲：「邊有人會遲到㗎？你當我哋係遲到族？」
我呆咗，我忽然諗起，以前喺遲到族面試嗰陣，我永遠都係最早到，有時連面試官都未到。
當我展現出我嘅效率同守時，所有面試官都驚為天人，願意畀最好嘅職位我。
但依加，門口有無數個準時嘅應徵者。
我以往將所有嘅努力擺晒落「令自己變得守時」度，自以為無比出色，但移咗民之後，守時只係基本要求。
面試官淡淡然咁同我講：「你返去等消息啦。」
忽然間，我有少少後悔移咗民。
我一直想追求理想嘅世界，呢度就好理想，所有人守時而有效率。
但喺理想嘅世界裡面，我未必做到最理想嘅我。
—完—
將專頁設定為「搶先看」/ "See first"，最新故仔馬上睇！
殺手直播：https://goo.gl/9Ctewy
如果沒有愛情：http://bit.do/e4wNy
#短故 #短篇 #小說 #陳美濤 #廣東話 #粵語 #tomatochan #大家愛遲到
Search